Anbefaler auka kongekrabbe-kvote

Havforskingsinstituttet (HI) tilrår at den totale fangsten av kongekrabbe ikkje overstig 1510 tonn hannkrabbe i 2025. 

– Bestandsvurderinga viser ein auke i den haustbare kongekrabbebestanden, og det ser ut som den reduserte kvoten i inneverande år har ført til ein lågare fiskeridødelegheit, forklarar bestandsansvarleg Ann Merete Hjelset. 

For 2024 var den anbefalte kvoten 966 tonn. 

Fritt fiske vest for Nordkapp

Kongekrabbe er ein introdusert art i norske farvatn, og vert forvalta ut frå eit todelt mål. 

I Aust-Finnmark er målet å oppretthalde eit langsiktig fiskeri gjennom kvoterådgjeving. Vest for Nordkapp er det derimot fritt fiske av kongekrabbe, for å avgrense kor krabben spreier seg.

Havforskingsinstituttet tilrår at det frie fisket utanfor det kvoteregulerte området vert oppretthalde:

– Dette er både for å redusere kor fort kongekrabben spreier seg, og samstundes for å sikre forvaltningsmålet om å halde tettleiken av kongekrabbe i dette området på eit lågt nivå, seier Hjelset. 

Tilrår utvida freding

I april er kongekrabben freda frå fiske. Det er for å avgrense skadar på krabbar som byter skal og såleis er meir sårbare, og for å verne krabbane i gytesesongen. 

Havforskarane rår om at denne fredingsperioden vert utvida til å vare ut mai. 

– Vi ser at andelen skadde krabbar – altså dei som manglar bein eller klør – har auka i takt med det tiltakande fisketrykket. Ei utvida fredingsperiode vil kunne hjelpe på dette, seier havforskaren.

I tillegg vil ei utvida freding kunne vere gunstig for fiskeriet: 

– Fyllingsgraden er best om hausten og vinteren. Om fisket føregår i denne perioden, er krabben av høgare kvalitet og gir betre utbytte for fiskarane.