Krigen får konsekvenser for forskningssamarbeidet
Krigen i Ukraina får konsekvensar for det norsk-russiske forskingssamarbeidet til Havforskingsinstituttet. Nokre aktivitetar vert avlyst, andre går per no som planlagt, opplyser Havforskingsinstituttet på sine nettsider.
Norske og russiske havforskarar har samarbeida tett i mange tiår. Forskarane har delt forskingsdata, reist på tokt og drøfta seg fram til kvoteråd for bestandane i Barentshavet i saman.
Sidan 1958 har forskarar frå dei to landa møttest årleg for å diskutere fag og planleggje felles tokt, konferansar og møter. I 1965 drog forskarane på sitt første felles tokt.
I våre dagar samarbeider norske og russiske forskarar mellom anna om verdas mest omfattande økosystemtokt.
Data frå dette toktet dannar grunnlag for kvoteråd og anbefalingar til den heilskaplege forvaltinga av Barentshavet.
HI sitt samarbeid med Russland skjer i all hovudsak gjennom det sentrale, russiske fiskeriforskingsinstituttet VNIRO si nordlege avdeling i Murmansk, som tidlegare bar namnet PINRO.
Norsk-russisk fiskerisamarbeid unntatt sanksjonane
Noreg har kutta kontakta med russiske styresmakter til eit minimum, men så langt har det norsk-russiske fiskerisamarbeidet vore unntatt sanksjonane.
Det betyr mellom anna at det norsk-russiske symposiet og forskarmøtet i Tromsø i mai-juni framleis skal gå etter planen.
– Dersom fiskerisamarbeidet skulle bli ein del av sanksjonane, vil ikkje forskarane kunne dela informasjon over landegrensene. Då får vi eit dårlegare vitskapleg grunnlag for å fastsetje fiskekvotane, og det vil vera klart uheldig, seier havforskingsdirektør Nils Gunnar Kvamstø
